相信一般而言，坊間大部份中醫文章都係教大家健康及食療，好少有機會睇到中醫師以貼地既角度做分享，今次正好可以讓醫師現身說法，讓大家知道中醫師的所見所聞以及有趣的經歴

今集節目因具有資訊性，醫師們更樂於分享，所以一次的訪問剪成了兩集播放。

YouTube預告

ViuTV 足本重溫（需要登入ViuTV）：

晚吹 – 又要威 又要戴頭盔

第369集註冊中醫 (I)

第370集註冊中醫 (II)

---

幾位醫師都比較年輕啲，有冇試過畀病人Challenge？

試過有中年女士入到診室，就一直掃住手機話唔得呀！唔得呀！最後佢揀咗隔嚟個位較老既女醫師，其實喺佢係咁講「唔得呀」個時我都有陳述返，而家出嚟考試註冊嘅醫師都係大學畢業，經過嚴格嘅培訓，哩啲本身已經對醫師冇信心嘅，你幾有料都未必會醫好佢，隨緣而去最好。其實佢唔知我哋呢行有唔少係中途轉職，識得有個滿頭白髮嘅師弟，一考牌就喺老醫師直接令人感覺到「經驗豐富」（假像）。

你哋啲病人多數係為咗咩而睇中醫？（真係醫病？調理身體？美容減肥？）

多數睇你處於乜嘢診所，如果喺街邊診所多數係會睇病，感冒同埋痛症比較多。

如果診所本身市場係做幫助懷孕，就會睇婦科病比較多。

診所本身多講小朋友資訊，就睇兒科多。

好似我本身主力睇美容，就會瘦面、減肥、豐胸比較多，但往往喺呢一堆人當中都會搵到好多健康已經處於中下水平嘅人，只係西醫嘅報告未必發現到指數上有問題，而同時係因為哩啲問題，令到佢地面色唔好，膚質偏油，多暗瘡之類。

有冇遇過一啲病人係因為特別或者奇怪嘅原因嚟睇症？

一：診所有做唔同類型嘅宣傳，有試過一啲係話自己KOL介紹過嚟，想試吓KOL做過嘅嘢，純粹好奇

二：行過路過，喺隔離等緊位飲茶，見診所新開有位就過嚟睇吓

三：潛在病人，有時IG收到奇怪相片或文字描述，或打嚟診所問奇怪嘢。女醫師，或者男醫師都有機會被性騷擾，多數講完就冇咗影

成日聽人話要快醫好個病就睇西醫，調理先好睇中醫，你哋同唔同意？

非常之唔同意，不過理解大眾嘅諗法，因為我哋自細都係喺西醫嘅環境之下教育出嚟，冇接觸過中醫嘅，本身就冇中醫可以快醫病嘅概念，自然一病個腦唔會諗到哩個選擇。

但其實中醫可以非常之快，舉個例子，就好似屋企有煙頭㷫着左張紙，你意識到就好快可以救熄佢。但到到張紙已經燒埋其他衫，咁大火先至意識到，就需要動用多啲嘅資源去救佢，而自己亦都未必識得救呢一場火。

喺感冒非常之初期，可能啲人已經感覺到自己有輕微喉嚨痛、口乾飲極水唔夠、輕微頭痛，其實呢個時候就係病向淺中醫嘅最佳時機，識得哩個時候戒口，食清少少，休息多啲，就已經唔會加重；但往往冇相關嘅經驗/中醫知識，就會覺得冇乜嘢，繼續飲凍嘢，食辣嘢，煎炸嘢，咁就等於火上加油，出現更多感冒症狀。

如果我自己已經出現比較多感冒嘅症狀，多數一兩包藥再配合乖乖地特登早啲休息都已經好快會好返。

有冇一啲中醫服務係比較新啲冇乜人知？

美容針灸、埋線、豐胸、小兒推拿。

前邊嘅美容服務，都係隨着大家嘅思想開放，工藝成熟，而得以發展，好似埋線咁，因為發明到可以溶解嘅蛋白線，而藉此技術將蛋白線放喺相關穴位或者皮下脂肪嘅位置，就可以達到長效刺激穴位、令到身體膠原蛋白增生等等嘅功能。呢啲新技術就正如iPhone橫空面世一樣，一旦出現就可以加以利用，成就更多治病嘅可能性。

小兒推拿唔係新，只係唔多人發展，而家陸續都有專做哩項嘅診所，畀小朋友一個唔食藥又輕輕鬆鬆去似去玩咁治病嘅機會。

中醫涉及好多範疇，其實係咪同西醫一樣有專科？例如針灸、正骨等等

中醫藥管理委員會建議中醫分為內科、針灸、骨傷科。但往往病人都唔識得分自己應該睇邊科，亦都可能同西醫嘅成長思維習慣有關，所以反而診所講明返可以睇邊一啲科目，例如：婦科、皮膚科、兒科、腫瘤科、心臟科、中風科等等。

你收過最貴嘅症係幾錢同埋係做啲咩？

早期普通門診，上門針灸應診印象中收1000以上，實際唔太記得。

係去醫院做中風針灸，而其實上門出診最主要係時間成本，一般上門鍾意都唔會收得太平，有聽過同行接一班人約埋一次過睇症，例如係公司福利，或者老人院呢一類。

埋線減肥或者生髮，係用頂尖優質、溶解時間較長期有效嘅英國埋線，一針一線，用嘅線比較多，一般$5000以上，價格都係公司定。

減肥會埋係四肢比較多脂肪嘅位置，肚仔幫助收胃口、調脾胃祛濕嘅嘅穴位，生髮會埋對氣血有益嘅穴位之餘，亦會埋係頭皮。

有冇聽過同行有一啲離譜嘅劏客行為？

其實都睇客人覺得嗰個消費值唔值嗰個價錢，以前睇書見過一個道理，有條水喉塞咗，叫咗個水喉匠去整，佢帶咗架撐嚟，喺水管嗰度輕輕敲左一下，問題就已經解決左，收費$1000，咁客人就覺得好唔抵，咁容易嘅問題你收$1000？就叫佢寫返張單嚟睇，咁佢張單就寫返：

敲1下:$1

知道敲邊度：$999

所以如果係平嘅，病人睇極都唔好，咁其實平一平都冇用，而貴嘅亦可能有佢貴嘅道理。咁當然可以舉一反三，佢可以自己考慮讀一個六年嘅中醫課程，考中醫牌，以後免費幫自己醫病。

劏客有時未必係同行，可能係個別公司嘅sales部門，或者老闆指示，咁個老闆本身係咪中醫師唔知喇。

好多療程都會同病人有身體接觸，係咪女中醫會著數啲多人搵啲？

女中醫+年紀大係喺我經驗以來係最受歡迎嘅，但亦有見過有男醫師正直，有晒幫眼，就算女病人都會好放心。

一：普遍主動睇中醫以女性居多

二：講一啲月經尷尬嘢會比較放心

三：有啲女性比較敏感，或者可能因為過往嘅一啲經驗，所以唔想同男性有身體接觸，咁骨傷科中醫師就比較容易有相關案件投訴

有冇遇過啲特別深刻嘅事？（無理客人、尷尬情況etc.)

-有時會重複問病人嘅問題，或者把咗兩次脈。

-呀媽帶個女嚟睇病，阿媽自己答晒所有我問阿女嘅問題，而我攞唔到阿女嘅真實答案，有啲情況要駛開阿媽，去令個女女獨立去老實答我嘅問題，多數呢啲尷尬嘢係唔可以喺阿媽面前答：近來有冇性行為？哩類。因為女性診症同月經有關嘅基本上一定要排除懷孕嘅可能，但我知嗰個女女喺阿媽面前一定唔會答最真實嘅嘢，所以一定要搵方法駛走阿媽。

-夫婦一齊嚟，個男嘅好funny，太太係咁叫佢唔好阻著醫師做嘢，好似湊細路咁。

-有遇過就嚟想讀中醫嘅學生，一個係家長帶過嚟，鼓勵我叫佢努力讀書，探討下佢興趣去讀中醫；另外一個係當年DSE考生，咁佢最後係去咗內地讀中醫，計落應該差唔多畢業，我而家都有仲有同佢聯絡。

-有聽過其他診所遺忘咗客人，閂埋燈，變相流針嘅時間長咗好多。

中醫成日叫人戒口，唔食得煎炸嘢辣嘢生冷嘢，你哋自己平時又有冇戒口？

可以話有意識地戒口，亦都有意識地破戒。因為知道治病嘅方法，知道食每一樣嘢有機會引致嘅後果，所以食定唔食就係自己嘅選擇嚟。

正如頭先講燒着張紙嗰個道理一樣，我好早期已經發現個病源，咁每次未必係燒咗張紙喎，有機會係水管穿窿漏水咁細微，只要我意識到嗰個唔係一個健康嘅常態，咁我就會主動去戒口或者食返相應清熱、祛濕、潤燥等等嘅食物去救自己。

睇電視古裝劇成日話把個脈就可以知道好多身體狀況，係真定假？

把脈的確係可以知道好多身體嘅情況，本身我哋每一隻手指摸嘅位置係代表唔同嘅臟腑，而輕力中力同重力按落去，亦都感覺到唔同嘅脈象，所以摸脈的確係比到我哋唔少嘅資訊，例如我哋可以摸到脾胃係比較弱，其實就基本可以處方用藥，但實際上有一啲生活習慣就最好有溝通上去確認。

既然病人意識清醒，唔係好似中風患者個類失去語言能力嘅，我哋就可以由問診知道佢究竟係咪成日食凍嘢搞到脾胃咁寒，如果佢話自己已經戒晒凍嘢，點知再問出嚟原來一日食三四個生果，咁我哋就要再教育病人去糾正佢嘅生活習慣，令到佢得到一個全面嘅診治，亦希望佢可以得到長遠健康。

中醫本身係用四診去幫助我哋判斷一個疾病，把脈可能係一個比較有特徵性嘅中醫應用，正如西醫嘅聽診器一樣，經常會以呢個形態作為一個借代。

COVID遙距診症，都實證指出我哋未必需要把脈，都可以準確地處方用藥，實實際際哋醫好有COVID嘅人，有COVID後遺嘅人，所以唔好將中醫拘泥於把脈，而家有埋視像、影相，已經更加容易判斷到嗰個人嘅精神狀態、氣息。

而家嘅中醫有冇照x光或者化驗之類嘅服務？

有部份化驗所會同中醫診所合作，中醫寫單可以作為轉介，而的確我哋呢一行係有需要呢一類嘅服務去幫助我哋診斷更加準確，呢一類嘅服務對於我嚟講係比較中性，好似X-Ray等同影到一張相一樣，只係張相晒出嚟係影骨為主，做骨傷推拿嘅，有得清楚啲，診斷準確啲，用手法亦更準確。

有冇遇過啲病人會虛報自己嘅健康狀況？（e.g.懷孕/長期病患）會唔會影響你哋嘅判斷？

可能初出茅廬嗰陣時會有時忽略咗一啲問題，但而家基本上入到嚟都會問有冇任何食物有咩過敏，高血壓糖尿病心臟病，鼻敏感濕疹哮喘，有冇長食西藥或營養補充品，有冇做過手術等等，去保障自己，同知多少少病人身體大概。

頭先所講月經問題，尤其是遲咗嚟M，一定要排除有冇懷孕，如果有懷孕一般會避免用一啲活血化瘀嘅藥物，以免影響個胎。

都的確有人會虛報自己嘅健康狀況，尤其是想拎病假紙嘅，多數佢哋會講啲好唔合理嘅病徵，又或者自己講留口風，得知佢係呃假紙，一般都會客氣地請佢走。

如果第一次睇中醫，有冇要特別留意嘅事項？

一般第一次睇我哋診所嘅病人，我哋都會有個reminder，睇吓佢做咩項目，預計返佢相應嘅時間。

如果係溝通能力唔好，又或者係關乎生育嘅，我哋都歡迎一位家屬陪同出席，讓家人更了解病況，如有任何醫療報告，歡迎帶給醫生作參考。

有冇一啲線索可以知道個醫師係咪真材實料？或者遇到咩情況係代表個醫師係亂咁嚟？

首先一定要有中醫註冊編號或表列編號，確認咗你睇緊嘅係香港政府認可嘅中醫先，有陣時個醫生可能好好，但可能因為一啲溝通表達而令到病人失去信心，或者誤解中醫。

一般我比較唔認同開下下都開30幾40幾味藥，有見過寫處方嘅藥材舖醫師，自己寫嘅藥物重複咗都唔知。

又或者對任何病人，任何病種，任何病情永遠都用同一個處方，佢可能有用，但佢呢一種開藥嘅方法同我係大學學嘅嘅實在太過違背，我相信病情好輕嘅其實可以用好少味數及重量嘅藥。

有冇嘢想同同行或者病人講？

唔相信中醫嘅：可以自己驗證，或者去challenge到大學課程摺埋。

同行：一齊努力用實際例子宣揚中醫嘅好，加油！